Anti-gone Junges Theater KEN, ZH

Las giuvnas acturas ed ils giuvens acturs han intercurì l'istorgia antica dad Antigone or da lur atgna perspectiva odierna. La sceptica iniziala, schebain questa istorgia, naschida avant millis onns, possia anc animar nus oz da reflectar, è svanida cun las scuvertas surprendentas ch'els han fatg. Adina puspè èn s'avertas novas portas che han manà a patratgs zuppads. Cun agid da l'istorgia veglia han ils giuvenils dà l'emprim in sguard en il passà. Là han els però scuvert chaussas enconuschentas ed han pudì far la punt cun la vita odierna: il ferm cumbat per gistadad, il curaschi e l'altruissem da far frunt a las normas e leschas vertentas e prender en cumpra dischavantatgs persunals per quest cumbat. Antigone valitescha l'amur per ses frar pli aut ch'il dretg statal vertent, ed ella sutterrescha Polyneikes, malgrà il scumond valaivel. Per tge cumbattess Antigone oz? N'avain nus oz betg sezs enta maun noss agen destin? Tge pretsch stuain nus pajar per la resistenza? 

Corona ha impedì ch'il toc «Anti-Gone» ha pudì vegnir represchentà il 2021 a chaschun d'ina saira da teater. Ils giuvenils han realisà persuenter in gieu auditiv ch'ins po tadlar sur in temp pli lung en adina puspè auters lieus.