«BITE MARRY KILL» junges theater basel (BS)
Lingua:
tudestg
Durada:
95 minutas
lieu d’occurrenza:
Alte Reithalle, Bühne Ost
Sut la reschia da Suna Gürler ans dattan quatter actur:as in'invista temeraria en la vita da giuvens vampirs dad oz.
Yuri ha serrà en sasez en il solarium 24/7 da ses geniturs. Lezs èn emigrads en il sulegl da Florida e laschan enavos lur figl che n’ha betg gugent midadas. Paco, l’ami da Yuri, sto entant ir a l’ospital pervi d’ina malsogna dal sang misteriusa e las duas soras Inna e Ziska, che vegnan tuttenina or dal nagut, na rendan betg pli simpla la chaussa. Ellas pretendan d’avair vivì qua – e da lura esser vegnidas stgatschadas. Ellas sa sentan il meglier, sch’ins na vesa betg il sulegl. Quai po avair da far cun il fatg ch’ellas èn DJs. Però n’è BITE MARRY KILL betg mo in gieu per ellas. Gia prest remartga Yuri che tscherts han dapli said che auters.
Suenter la represchentaziun ha lieu «nachgefragt»*.
acturas ed acturs: Ellen Walther, Gökdeniz Yildirim, Janis Urosevic, Xhenisa Demiri, reschia: Suna Gürler, text: Lucien Haug, equipament: Johanna Bajohr, musica: Gil Schneider, dramaturgia: Uwe Heinrich, tecnica: Claudio Bagno, Pina Schläpfer, assistenza: Rosa-Lin Meessen
Ponderaziuns da la gruppa da program
L’emprim vai ina giada simplamain per vampirs. Però era per amur, queerness, furmas da relaziuns alternativas, ierta, culpa, appropriaziun ed experientschas da migraziun. I vegn negozià en dialect famigliar e cun bler viz, senza perder seriusadad. Grazia al ‘tric’ artistic dals vampirs reusseschi a l’inscenaziun da pledentar la giuventetgna en differentas posiziuns marginalisadas, senza declerar. Ina saira da teater mo per la giuventetgna.
Ti pensas che saja tschitschà or l’ultim gut da sang dal tema vampirs il pli tard suenter «Twilight», «True blood» e «What we do in the shadows»? Lura avra il «junges theater basel» ils egls a tai! Sut la reschia da Suna Gürler ans dattan quatter actur:as in’invista temeraria en la vita da giuvens vampirs dad oz. Equipads cun ils pleds da l’autur Lucien Haug sa bittan els cun plaschair en la materia cun tut ses mitus e clischés. Però: Co s’arranschan las figuras cun il fatg da betg vegnir pli veglias? Co pon ellas far part dal mund normal? Èn amicizias cun umans pussaivlas? E tge capiti, sche l’amur fa part dal gieu?
Descripziun da la gruppa
Dapi il 1977 è il junges theater basel precis quai ch’il num empermetta: il lieu per teater giuven a Basilea. Qua vegnan giugadas represchentaziuns professiunalas per giuvenils. Ed en il rom da curs da teater ha la giuventetgna la chaschun da scuvrir las abilitads sco acturas u acturs.
Mintga stagiun datti duas inscenaziuns professiunalas. Ellas vegnan elavuradas sut ina direcziun professiunala, e quai otg uras a di durant otg emnas. Suenter vegnan ellas preschentadas circa 20 giadas a Basilea e lura mussadas en Svizra ed er a festivals internaziunals. Ils ensembles alternants da glieud professiunala e da persunas laicas vegnan mintgamai cumponids per ils projects. Per il pli vegnan pledentadas giuvnas e giuvens che participeschan als curs da teater. Enturn ils giuvenils èn tut las posiziuns – p.ex. reschia, tribuna, costums, musica, glisch, dramaturgia – occupadas da profis.
Per ils quatter curs da teater pon s’annunziar tut las persunas tranter 14 e 24 onns. En provas emnilas da duas uras vegnan elavuradas las basas dal far teater a maun d’in tema tschernì sez. Curt avant las vacanzas da stad e suenter in temp da prova dad in onn vegnan ils resultads preschentads trais giadas a la publicitad.
*«nachgefragt» è ina purschida d’intermediaziun da fanfaluca. Gist suenter l’inscenaziun s’inscuntran las acturas ed ils acturs ed il public en il lieu da represchentaziun per far dumondas, dar resuns u far cumpliments. Il format dura mo 15 minutas e duai animar da sa barattar era suenter l’inscenaziun davart quai ch’è capità.
Vulais Vus visitar la represchentaziun cun ina classa da scola u cun ina gruppa pli gronda? Duvrais Vus agid per tscherner il program? U avessas Vus gugent ina purschida d’intermediaziun per la represchentaziun? Lura As annunziai gugent tar nus via e-mail: info@fanfaluca.ch