«Macht und Liebe im Mittelalter» Ensemble Macht und Liebe (ZH)

«Macht und Liebe im Mittelalter» è ina delicatessa, ina cumedia, in spectacul. Durant 70 minutas vegn sautà, dà spada, fatg striegn e pregià per in retg che na vul betg vegnir creschì. I dat miraculs, eroxas ed eroxs levan da mort en vita. Questa ura è magia. Questa ura è in gieu. E cunzunt: «Macht und Liebe im Mittelalter» sa che spass è politic.

Suenter la represchentaziun ha lieu «nachgefragt»*.

gieu: Alessandro Schneiter, Alicia Löffler, Iljana Lips, Kaspar Chassé, Tomás Bashe Fernandez de Gamboa, dramaturgia: Lelah Neary, reschia: Lelah Neary, costums: Lee Fischer, design d’objects: Anouk El Gabri, mascra: Réka Ertl, assistenza da reschia: Lea Schubarth

Ponderaziuns da la gruppa da program

Il giuven collectiv Liebe&Macht enturn la reschissura Lelah Neary prenda nus cun el sin in viadi tras il temp. Nus arrivain en il temp medieval ed inscuntrain strias starmentusas, eroxs curaschus, retgs pussants e princessas che ston vegnir deliberadas – ma tuttina vegn tut mess sin il chau e prenda vias nunenconuschentas. Ina saira da teater rasanta, emplenida cun il plaschair da rumper ora da las structuras narrativas usitadas e da prender novas vias sco ch’i para e plascha tant sin nivel da la lingua sco era dal gieu.

Damas e signurs nobels, ina lingua elevada e bler tamtam per nagut? Tgi che spetga tenor il titel in toc che intuna tals tuns, vegn l’emprim dischillusiunà. I dat bain las figuras classicas da l’erox, dal retg e da la stria. L’inscenaziun sa mova però sin in fil talmain graschel tranter l’absurditad e la comica che clischés e spetgas vegnan destruids en ina moda prest dadaistica. Cun in agen viz, in bun timing, figuras elavuradas cleramain ed in’energia leva ed uffantila sa differenziescha quest toc dal champ dal temp medieval usità e creescha ina tut atgna DNA. Quai na plascha forsa betg a tuts, ma sch’ins sa lascha involver passent’ins ina saira fitg divertenta ed extraordinaria.