fanfaluca fa dapi blers onns part da la vita culturala dad Aarau e excluda ses fritgs en tut la Svizra.
fanfaluca
fanfaluca è in festival per gruppas da saut e da teater cun actur:as giuvenil:as tranter 16 e 26 onns da tut las regiuns linguisticas da la Svizra. Gruppas da teater da scolas, gruppas da saut, clubs da teater, teaters da studentas e students u ensembles da la scena libra pon s'annunziar a chaschun da la publicaziun annuala u vegnan scuverts da la gruppa da program e dumandads da sa participar.
Las gruppas envidadas s'inscuntran durant sis dis per sa preschentar ina a l'autra ed a la publicitad, ma era per sa barattar davart lur lavur e sa participar a lavuratoris da pliras spartas manads dad actur:as, coreograf:as, decoratur:as da tribuna, autur:as e reschissur:as da professiun, sco era per collavurar en il rom da residenzas.
Ultra da las represchentaziuns publicas en l'Alte Reithalle ad Aarau porscha il festival numnadamain dapi il 2021 era l'occasiun da sa participar a residenzas. Gruppas existentas u sa furmadas nov pon exercitar, experimentar e sa barattar sin l'areal dal festival. A la fin datti ina preschentaziun cuminaivla. Artist:as singul:as sco era gruppas pon s'annunziar per residenzas d'in di u da plirs dis.
Istorgia
Il festival è vegnì fundà il 2014, las emprimas ediziuns èn dentant anc vegnidas realisadas sut il num «Festival svizzer da teater per la giuventetgna» fin ch'el è vegnì renumnà il 2018 en «fanfaluca».
La Bühne Aarau è dapi l'entschatta la partenaria da fanfaluca. La citad dad Aarau cun l'Alte Reithalle, bain cuntanschibla amez il triangul Basilea-Berna-Turitg, è la plattafurma ideala per realisar il festival da sis dis ed è sa cumprovada e s'etablida ils ultims onns sco lieu da sentupada urban. L'anteriura halla da chavaltgar cun sia tempra unica e l'infrastructura adattada è il lieu ideal per innovaziuns creativ-culturalas sin il champ dal saut e dal teater per la giuventetgna. Il public po sa legrar sin sauts, tocs da teater e performances contemporans ed esser spanegià sin il program accumpagnant.
Pervi da las lavurs da renovaziun da l'Alte Reithalle èn las ediziuns dals onns 2019-21 vegnidas realisadas en differents lieus ad Aarau – en ina tenda en il Schachen, en la Tuchlaube e sin l'insla da las ovras idraulicas eniwa. Il 2022 returna il festival sin la tribuna da l'Alte Reithalle.